«Жеңгелер мектебі: заманауи сән-бойжеткеннің тәрбиесіне келе ме?»

Абай облысы білім басқармасының Аягөз ауданы білім бөлімінің "№ 5 жалпы орта білім беретін мектебі" КММ-де 8–10 сынып оқушылары арасында
«Жеңгелер мектебі: заманауи сән-бойжеткеннің тәрбиесіне келе ме?»
тақырыбында дебат ойыны ұйымдастырылды. Аталған дебаттың негізгі мақсаты – оқушылардың ұлттық құндылықтар мен заманауи өмір салты арасындағы байланысқа сыни көзқараспен қарауын қалыптастыру, қазақ халқының дәстүрлі тәрбиелік институттарының (жеңге, әже, отбасы тәрбиесі) қоғамдағы рөлін түсіндіру, сондай-ақ жастардың өз ойын еркін, дәлелді әрі мәдениетті түрде жеткізу дағдыларын дамыту.

Дебат барысында қатысушылар екі тарапқа бөлініп, өз ұстанымдарын қорғады.
Үкімет тобы жеңгелер мектебінің бойжеткен тәрбиесіндегі маңызын атап өтіп, оның:
• қыз баланың әдебі мен ибалығын қалыптастырудағы рөлі
• ұлттық тәрбие мен салт-дәстүрді сақтаудағы орны
• үлкен мен кіші арасындағы сыйластықты үйретудегі маңызын дәлелдер арқылы жеткізді.
Ал Оппозиция тобы қазіргі заман талабына сай:
• қыз тәрбиесінің өзгеруі
• заманауи сән, білім мен жеке еркіндіктің алдыңғы орынға шығуы
• тәрбиенің жаңа формаларының қалыптасуы туралы пікірлерін білдірді.
Оқушылар өз ойларын нақты мысалдармен, өмірмен байланыстыра отырып қорғап, қарсы тараптың пікіріне мәдениетті түрде жауап берді. Пікірсайыс барысында логикалық ойлау, дәлел келтіру, тыңдай білу және пікірталас мәдениетін сақтау дағдылары айқын көрініс тапты.