RU KZ

Мектебімізде "Абайтану" кабинеті ашылды

Абай Құнанбайұлының 175 жылдық мерейтойын ұйымдастыру және өткізу туралы облыстық жоспарын іске асыру шараларының шеңберінде Аягөз аудандық білім бөлімінің "№ 5ЖББОМ" КММ-да   "Абайтану"кабинеті ашылды.   

Кабинеттің ашылу салтанатына аудандық білім бөлімінің басшысы, әдістемелік кабинет әдіскерлері, қалалық білім беру мекемелерінің директорлары, оқу ісі меңгерушілері, қазақ тілі мен әдебиеті пәні бірлестігінің жетекшілері,  зейнеткер ұстаздар қатысты. 

Кабинеттің тұсаукесеріне жиналған қауымға "Жас ақын" үйірмесінің мүшелері Абай Құнанбайұлына деген құрмет пен сүйіспеншілікке толы өлеңдерін арнады. 

"Драма" үйірмесінің мүшелері дайындаған Абай өмірінің әр кезеңі ақын шығармашылығымен сабақтастырыла отырып сахналанды. 

Мектебіміздің ғана емес ауданымыздың да мақтанышына айналған 6-сынып оқушысы Тұрсынова Марал орындаған ақын әні көпшіліктің көңілін көтерді. 

Білім бөлімінің басшысы Н.Т Азимбаев қазіргі қоғамдағы Абай мұрасының маңыздылығы мен өсиетінің өзектілігіне тоқталды.  

Кабинеттің тұсауын қазақ тілі мен әдебиеті пәнінің мұғалімі болып жұмыс істеген   ардагер ұстаздар Р.Ғ. Әзілханова, Қ.Ғ. Кәріпжанова кесіп, шашуларын шашты. 

"Абайтану"кабинетін ашудағы негізгі мақсат- мектеп бағдарламасында оқытылатын курстың оқытылуы мен оқылуын жетілдіру, оқушылардың әлеуетін арттыру, мұғалімдердің шығармашыл қырын жетілдіруге бағытталған. 

Кабинет паспорты, жұмыс жоспары, оқу бағдарламалары әр сынып бойынша жеке-жеке папкаларға салынып, "Абайтану" курсы бойынша оқу бағдарламалары" атты стиллажға қойылған. 

Курсты оқытуға арналған ғылыми-әдістемелік әдебиеттер "Абайтану" курсы бойынша оқу-әдістемелік құралдар" стилажын толтырып тұр. 

Мұғалімдер мен оқушылардың нәтижелі жұмыстары "Абайтану" курсы бойынша жетістіктері" стиллажға жинақталған. 

"Абайтану"курсы бойынша электронды оқу құралдарына» арналған стиллажда Қанипа Бітібаеваның электронды  оқулығы, Семейдегі Абай-Бөрілі мемориалдық мұражайы шығарған дискілер, елімізге танымал жыршы-термешілердің орындаған ақын әндері, шығармаларының аудио нұсқалары жинақталған.

Тақырыптық стендтер Абайдың табиғат лирикасымен үйлестікте жасалған. Ақынның "Қыс", "Жазғытұры", "Жаз", "Күз" өлеңдерінің желісімен орындалған авангардтық үлгідегі стендтерде "Абайтану" курсын оқытуға қажетті әдеби, көрнекі құралдар ерекше үлгімен орналастырылған. Композицияның толық аяқталуына оқушылар қаламынан туған жыл мезгіліне байланысты суреттер де септігін тигізген. 

"Тектіден текті туады, тектілік тұқым қуады" тақырыбындағы стендте Абайдың шыққан тегімен таныссақ, "Абай - телегей теңіз" стендінде Абайдың шығармалары туралы білеміз, "Абайды тану - қазақты тану" стендінде Ахмет Байтұрсынұлы бастаған абайтанушылар еңбектері және пікірлері жинақталған, "Абайды оқы, таңырқа" стендінде   Абай мұрасын тану арқылы биіктерге шыққан оқушылардың жетістіктері орын  тапқан. Кабинеттің мультимедиялық құралдармен жабдықталуы, жоғары жылдамдықтағы интернет желісімен қамтылуы да арнайы тоқталуды қажет етеді. Интерактивті тақта, мультимедиялық проектор, дербес компьютер, желілік фильтр, колонкалар, әрбір оқушының жұмысына арналған ноутбуктар мен құлаққаптардың болуы да жұмыстың нәтижелілігіне әсер ететіні анық.  

Мұғалім мен оқушылардың жұмыс орындары да соңғы үлгіде жасақталған. Береке мен бірліктің арқасында нәтижелі еңбек көрсетіп отырған мектеп ұжымы мен мектеп директоры А.А. Канапьяноваға Абайдың 175 жылдық мерейтойы шеңберінде атқарып жатқан сүбелі еңбектеріне табыс пен жоғары жетістіктер тілейміз.

Добавлено: 12-03-2020, 17:42
0
111

Добавить комментарий

Кликните на изображение чтобы обновить код, если он неразборчив

Наверх